У Беларусі з'явіцца лабірынт з рэліктавых дрэваў
ПАДЗЕІ
Вы можаце далучыцца да пасадкі першага ў Беларусі лесу з гінкга.

Гэтай вясной у 170-ці кіламетрах ад Мінска, недалёка ад Навалукомля, пасадзяць унікальны пітомнік дрэваў гінкга, якія раней не культываваліся ў Беларусі ў такіх колькасцях. Плануецца, што гэта будзе лабірынт у форме старажытнага будыйскага сімвала, якімі, дарэчы, з'яўляюцца і самі гэтыя дрэвы.

Ініцыятарка і арганізатарка пасадкі Ульяна Ашурка кажа: "Аднак ніякая рэлігія акрамя любові і веры ў нашую Планету не мае адносінаў да ідэі вырошчвання лесу".

Гінкга часта называюць жывым выкапнем. Дрэвы гэтага роду з'явіліся яшчэ ў палеазойскую эру і былі вельмі распаўсюджанымі ў розных кутках планеты. Аднак да сёння захаваўся толькі адзін від – гінкга двухлопасны. У дзікім выглядзе дрэва расце толькі ў двух раёнах на ўсходзе Кітая.


Фота russiaherb.com
Ульяна Ашурка тлумачыць важнасць гэтай пасадкі ў Беларусі: "Гінкга здольныя расці тысячы гадоў, выжываць у любых, самых жорсткіх умовах, супрацьстаяць паразітам і хваробам, накарміць многіх жывых істот, быць іх домам, разнастаіць і ўзнавіць мясцовую экасістэму. Вось чаму я хачу і заклікаю адзінадумцаў рабіць такую няпростую, але добрую справу ўжо зараз, неадкладна і мэтанакіравана.

Больш за пяць гадоў я вырошчваю гэтыя дрэвы і іншыя з насення і высаджваю іх дзе толькі магу. Але мне гэтага відавочна недастаткова.
Я не магу без болю глядзець, як мы, людзі гэтай зямлі, бярэм так шмат і даем так мала.
Сёння прыродныя месцы многімі ўспрымаюцца як куткі з іншых планет. А гэта значыць, што мы да непазнавальнасці змяняем Зямлю, бесперапынна урбанізуючы і захламляючы. Я не ўпэўненая, што праз пяцьдзясят гадоў многім будзе дасяжны шпацыр па лесе. Таму я спяшаюся! І прапаную разам ствараць альтэрнатыўнае заўтра".

Напрацягу месяца арганізатарам пасадкі патрабуюцца валанцёры. Наўзамен памагатыя змогуць забраць з пітомніка дзясятак саджанцаў гінкга, альбо іх імянныя дрэвы назаўсёды застануцца ў першым рэліктавым лесе Беларусі.
Наконт прыняцця удзелу ў пасадцы гінкга, развіцці праекту і стварэння пітомніка, фінансавай ці ідэйнай падтрымкі актыўнасці па вырошчванню рэліктавага лесу звяртайцеся да @ulyana ashurko ў асабістыя паведамленні ці званіце па тэлефоне +375447005751

Расказаць сябрам
Чытайце таксама
Made on
Tilda