Новая вёска з новымі ідэямі

ПАДЗЕІ
На Валожыншчыне прайшоў даўншыфтарскі форум
Форум "Новая вёска" адбыўся на мінулых выходных у вёсцы Лохаўшчына на Валожыншчыне. Каля 30 даўншыфтараў з розных куткоў Беларусі сабралася з мэтай пазнаёміцца, падзяліцца планамі, ідэямі, натхніцца і павучыцца адно ў аднаго.
Сваім досведам стварэння грамадзянскай супольнасці падзяліліся натхняльнік развіцця вёскі Касарычы Глускага раёну Андрэй Уфімцаў і Кацярына Затулівецер, а таксама прадстаўнік суполкі "Цудоўныя Пагоркі" на Валожыншчыне Мікіта Конанаў. Пра свой досвед правядзення мерапрыемстваў расказалі жыхары арт-вёскі "Чырвоны Кастрычнік" пад Рэчыцай Кірыл і Ірэн Краўцоўвы. Узаемадзеянню з мясцовымі ўладамі і правілам напісання зваротаў для вырашэння праблем навучылі вясковыя актывісты Аліна Нагорная і Ігар Случак. Усе прысутныя сталі ўладальнікамі кнігі-мануалу "Абаронім вёску" пра напісанне зваротаў. З пермакультурнымі асновамі ўдзельнікаў пазнаёміў стваральнік агранічнага лесасада-гадавальніка "Прарочы Сад" ля Старых Дарог Ілля Рэмез.
Як арганізаваць мясцовую школу, якія харчовыя культуры мэтазгодна вырошчваць у Беларусі, як змагацца з баршчэўнікам, куды пракласці роварны маршрут, як зацікавіць мясцовых жыхароў у супрацы, сакрэты прышчэпак і захавання старых гатункаў яблынь, аграэкатурызм і мясцовы актывізм — гэтыя і не толькі гэтыя тэмы гучалі напрацягу трох дзён форума.

Сярод удзельнікаў былі і героі нашых публікацый рамеснікі Насця і Сяргей Дабравольскія з Казіміраўкі на Лоеўшчыне, гаспадыня рэтрыт-фермы на Валожыншчыне "Smart Space Farm" Ульяна Кудзіна, захавальніца старога яблыневага саду ў Вялікім Запруддзі Наталля Юшкевіч. Дзіцячую зону і заняткі "мяккай школы" для фарумчанаў зладзіла жыхарка Лоска Марына Зарэцкая.
На форуме было месца для навучання і гульняў, кірмашу рамеснікаў, шпацыру па лесе і нават акунанню ў купель. У выніку паўстала сапраўдная даўншыфтарская суполка "Новая вёска" з агульнымі планамі на будучыню і надзеяй на развіццё беларускай глыбінкі.
Расказаць сябрам
Падпішыцеся
Каб нічога не прапусціць
Чытайце таксама